ବେଇମାନି କରି ଜିତିଲା କି ମୁମ୍ବାଇ ଇଣ୍ଡିଆନ୍ସ? ଶେଷ ବଲରେ ମୁମ୍ବାଇର ଏହି କାମକୁ ନେଇ ବଢିଲା ବିବାଦ, ଜାଣନ୍ତୁ କାହିଁକି
ଶନିବାର ଖେଳାଯାଇଥିବା ଆଇପିଏଲ ମ୍ୟାଚ୍ରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ମୁମ୍ବାଇ ଇଣ୍ଡିଆନ୍ସ ଶେଷ ବଲରେ ଜିତିଥିଲା। ମୁମ୍ବାଇ ଇଣ୍ଡିଆନ୍ସ ଶେଷ ବଲରୁ 219 ରନ୍ ଲକ୍ଷ୍ୟ ହାସଲ କରିଥିଲା। ଶେଷ ବଲରୁ ଦୁଇ ରନ୍ ନେଇ ପୋଲାର୍ଡ ମୁମ୍ବାଇକୁ ଜିତାଇଥିଲେ। ହେଲେ ଶେଷ ବଲରେ କିଛି ଏମିତି ଘଟିଥିଲା ଯେଉଁଥି ପାଇଁ ଏବେ ବିବାଦ ଦେଖାଦେଇଛି।
ଅଷ୍ଟ୍ରେଲିଆର କିମ୍ବଦନ୍ତୀ କ୍ରିକେଟର ବ୍ରାଡ ହଗ ମୁମ୍ବାଇ ଇଣ୍ଡିଆନ୍ସର ଖେଳ ଭାବନା ଉପରେ ପ୍ରଶ୍ନ କରିଛନ୍ତି। ଶେଷ ଓଭରରେ ଜିତିବା ପାଇଁ ମୁମ୍ବାଇ ଇଣ୍ଡିଆନ୍ସକୁ 16 ରନ୍ ଆବଶ୍ୟକ ଥିଲା। ପ୍ରଥମ ପାଞ୍ଚଟି ବଲରୁ 14 ରନ୍ ଏବଂ ଶେଷ ବଲରେ ଜିତିବା ପାଇଁ ମୁମ୍ବାଇ ଇଣ୍ଡିଆନ୍ସକୁ 2 ରନ୍ ଆବଶ୍ୟକ ଥିଲା, କିନ୍ତୁ ନନ୍ ଷ୍ଟ୍ରାଇକର ଧାୱାଲ କୁଲକର୍ଣ୍ଣି ଚେନ୍ନାଇର ବୋଲର ଲୁଙ୍ଗି ନିଗିଡି ବୋଲିଂ କରିବା ପୂର୍ବରୁ କ୍ରିଜ ଛାଡ଼ି ବହୁ ଆଗକୁ ପଳାଇଥିଲେ।
ଯେତେବେଳେ ପୋଲାର୍ଡ ସଟ୍ ଖେଳିଥିଲେ, କୁଲକର୍ଣ୍ଣି ସହଜରେ ଦୁଇ ରନ୍ ପୂରଣ କରିଥିଲେ ଏବଂ ମୁମ୍ବାଇ ବିଜୟ ଲାଭ କରିଥିଲା। ବ୍ରାଡ ହଗ୍ ଟ୍ୱିଟ୍ କରି ଲେଖିଛନ୍ତି, ଶେଷ ବଲ୍ ରେ ଜିତିବା ପାଇଁ ଗତକାଲି ଦୁଇ ରନ୍ ଆବଶ୍ୟକ ଥିଲା ଏବଂ ନନ୍ ଷ୍ଟ୍ରାଇକରେ ଥିବା ଖେଳାଳି ଏହାର ଫାଇଦା ଉଠାଇଥିଲେ। ଏହା କ୍ରୀଡ଼ା ଭାବନା କି? ' ତେବେ ଏହାକୁ ନେଇ ଫ୍ୟାନ୍ ମାନଙ୍କ ମଧ୍ୟରେ ବି ନାପସନ୍ଦ କରାଯାଇଛି। ଏହା ଉପରେ ବିସିସିଆଇ କଡା଼ ପଦକ୍ଷେପ ନେବା ପାଇଁ ଦାବି ହୋଇଛି।
କିରୋନ ପୋଲାର୍ଡଙ୍କ 34 ବଲରୁ 87 ରନର ଅପରାଜିତ ଇନିଂସ ପଛରେ ମୁମ୍ବାଇ ଇଣ୍ଡିଆନ୍ସ ଶନିବାର ଖେଳାଯାଇଥିବା ଆଇପିଏଲ ମ୍ୟାଚରେ 4 ୱିକେଟ ଜିତି ଏକ ଅସମ୍ଭବ ଲକ୍ଷ୍ୟକୁ ପଛରେ ପକାଇ ଦେଇଥିଲା। ମ୍ୟାନ୍ ଅଫ୍ ଦି ମ୍ୟାଚ୍ ପୋଲାର୍ଡ ଚମତ୍କାର ପ୍ରଦର୍ଶନ କରିଥିଲେ ଏବଂ ମୁମ୍ବାଇ ୬ ଟି ୱିକେଟ୍ ହରାଇବା ପରେ ଶେଷ ବଲରେ 219 ରନ୍ ସଂଗ୍ରହ କରିଥିଲା। ପୋଲାର୍ଡ ୮ଟି ଛକା ଓ ୬ଟି ଚୌକା ମଧ୍ୟ କରିଥିଲେ।
ଚଳିତ ସିଜିନର ଦ୍ରୁତତମ ଅର୍ଦ୍ଧଶତକ ପୂରଣ କରିବା ସହିତ ମାତ୍ର 17 ବଲରେ ପୋଲାର୍ଡ କ୍ରୁନାଲ ପାଣ୍ଡ୍ୟାଙ୍କ ସହ ଚତୁର୍ଥ ୱିକେଟ୍ ପାଇଁ 41 ବଲରେ 89 ରନର ଏକ ଗୁରୁତ୍ୱପୂର୍ଣ୍ଣ ଭାଗିଦାରୀ କରିଥିଲେ। ସାତୋଟି ମ୍ୟାଚରେ ଏହା ମୁମ୍ବାଇର ଚତୁର୍ଥ ବିଜୟ ଏବଂ 8 ପଏଣ୍ଟ ସହ ଦଳ ପଏଣ୍ଟ ଟେବୁଲରେ ଚତୁର୍ଥ ସ୍ଥାନରେ ରହିଛି। ସାତୋଟି ମ୍ୟାଚ୍ରେ ଚେନ୍ନାଇ ଦ୍ୱିତୀୟ ପରାଜୟର ସମ୍ମୁଖୀନ ହୋଇଛି ଏବଂ ଦଳ ପଏଣ୍ଟ ଟେବୁଲରେ 10 ପଏଣ୍ଟ ସହ ଶୀର୍ଷରେ ରହିଛି।