ଦେଖନ୍ତୁ ଭିଡ଼ିଓ: ରାସ୍ତା ଉପରେ ଗର୍ଭବତୀ ମହିଳାଙ୍କୁ ଘୋଷାଡ଼ି ଘୋଷାଡ଼ି ସୁନା ଚେନ୍ ଲୁଟିନେଲେ ଦୁର୍ବୁତ୍ତ,ଭାଇରାଲ ହେଲା ସିସିଟିଭି ଫୁଟେଜ଼….
ତାମିଲନାଡୁର ରାଜଧାନୀ ଚେନ୍ନାଇରେ ଘଟିଥିବା ଏକ ଘଟଣା ବର୍ତ୍ତମାନ ଖୁବ ଭାଇରାଲ ହେବାରେ ଲାଗିଛି। ଏଠାରେ ଜଣେ ଚେନ୍ ଅପହରଣକାରୀ ଜଣେ ମହିଳାଙ୍କ ବେକରୁ ସୁନା ଚେନ୍ ଛଡ଼ାଇ ନେଇ ତାଙ୍କୁ ରାସ୍ତାରେ ଟାଣି ନେଇଯାଉଥିବାର ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି।
ଏହି ଘଟଣା ରେ ଉକ୍ତ ମହିଳା ଜଣକ ଗୁରୁତର ଆହତ ହୋଇଥିବା ମଧ୍ୟ ଜଣାପଡିଛି। ଆଶ୍ଚର୍ଯ୍ୟଜନକ କଥା ହେଉଛି କି ଏହି ଘଟଣା ଶୁକ୍ରବାର ଘଟିଥିବା ବେଳେ ଏହା ଖୋଦ ମହିଳାଙ୍କ ଘର ସାମ୍ନାରେ ଘଟିଛି। ତେବେ ଏହି ସମଗ୍ର ଘଟଣାର ସିସିଟିଭି ଫୁଟେଜ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହାପରେ ଏଠାକାର ଆଇନ ଶୃଙ୍ଖଳା ପ୍ରସଙ୍ଗ କୁ ନେଇ ଲୋକମାନେ ସରକାରଙ୍କୁ ଦୋଷାରୋପ କରିବାରେ ଲାଗିଛନ୍ତି।
ପୁରା ଘଟଣା ଅନୁଯାୟୀ ମହିଳାଙ୍କ ବେକରୁ ଚେନ୍ ଛଡ଼ାଇବାକୁ ଚେଷ୍ଟା କରୁଥିବା ଦୁଇ ଅପରାଧି ମୋଟରସାଇକେଲ ଯୋଗେ ଆସିଥିଲେ। ଯେତେବେଳେ ସେ ଗୀତା ନାମକ ଏହି ମହିଳାଙ୍କ ଠାରୁ ଚେନ୍ ଛଡାଇବାକୁ ଚେଷ୍ଟା କଲେ, ଗୀତା ଏହାକୁ ତୀବ୍ର ବିରୋଧ କରିଥିଲେ। ଏହି ସମୟରେ ଏହି କ୍ରୁର ଦୁର୍ବୁତ୍ତମାନେ ତାଙ୍କୁ ରାସ୍ତାରେ ଟାଣି ନେଇଥିଲେ।
ତେବେ ପଡୋଶୀମାନେ ମହିଳାଙ୍କ ଚିତ୍କାର ଶୁଣି ଆସିବା ଭିତରେ ଉଭୟ ସୁନା ଚେନ୍ ନେଇ ବାଇକ ସାହାଯ୍ୟରେ ଖସି ପଳାଇବାରେ ସଫଳ ହୋଇଥିଲେ। ଏହି ଘଟଣା ରେ ଗୀତାଙ୍କ ଗୋଡ଼ ଓ ବାହୁରେ ଆଘାତ ଲାଗିଥିଲା ଏବଂ ତାଙ୍କୁ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଏହି ମାମଲାରେ ଗୀତାଙ୍କ ସ୍ୱାମୀ ରାମଚନ୍ଦ୍ରନ କହିଛନ୍ତି ଯେ ସେ ସେହି ଦିନ ପୋଲିସ ରେ ଏତଲା ଦେଇଥିଲେ, କିନ୍ତୁ ପୋଲିସ ଏହି ମାମଲାକୁ ହାଲୁକା ଭାବେ ଗ୍ରହଣ କରିଥିଲା ଏବଂ ମାମଲା ମଧ୍ୟ ପଞ୍ଜିକୃତ କରିନଥିଲା।
ତେବେ ଏହି ଘଟଣା ଭାଇରାଲ ହେବା ପରେ ପୋଲିସ ଏକ ମାମଲା ରୁଜୁ କରିବା ସହ ଜଣେ ଅପରାଧି କୁ ଗିରଫ କରିଥିବା ସୂଚନା ମିଳିଛି।